Tag Archives: Zegamako Udala

Zegama – Otzaurteko Orientazio Proba

Zegama, natura, mendia eta kirola ondo uztartzen diren hitzak direla ez dago zalantzarik. Bertako paisaia eta mendiek, inguruaz gozatzeko aukera paregabea eskaintzen dute, eta mendi maratoiaz gain, bestelako natura eta mendiko kirolak ere badute tokia Zegaman, nola ez!

Datorren ekainak 9 eta 10ean, Zegamako herria eta Otzaurteko inguruak, urteko Euskal Herriko orientazio probarik garrantzitsuenaren lekuko izango dira. GOT-ek (Gipuzkoako Orientazio Taldeak) Zegamako udala, Goierri Turismo, eta Gipuzkoako Parketxe Sarearen laguntzarekin ipar ligarako eta Pyrene ligarako baliagarria izango den asteburuko orientazio proba antolatuko du, bertan izango direlarik, Katalunia, Asturias, Gaztela edo Frantziako orientazio kirolaririk abilenak.

Kartela

Guztira 3 proba antolatuko dira. Lehena, ekainak 9 larunbatean izango da, distantzia ertaineko aldapa beherako proba bat, eta Beundako lepotik abiatu eta Otzaurteko lepoan amaituko da. Larunbat arratsaldean berriz, parte hartzaileak Zegamako herrira hurbilduko dira, eta herriko pilotalekuan zain egon ostean,  17.30tan herrian barrena, sprint modalitateko proba azkar eta dibertigarri bat izango dute zain.

Bukatzeko igande goizean, berriz ere Otzaurteko lepora igo, eta distantzia luzeko proba bat ospatuko da goiz guztian zehar. Amaitutakoan, sari banaketa  eguerdiko 14.00 tan izango delarik.

Orientazio kirola, maila eta gaitasun fisiko guztietako parte hartzaileentzako kirola da. Zegaman, 2 kilometroko ibilbide xamurrak edo 8 kilometroko mendiko buelta teknikoak. Eliteko orientazio kirolariekin batera, familia eta lagunek ere parte hartu ahal izango dute proba hauetan. Eta aukera paregabea izango da, mapa eta iparorratzarekin mendian edo herrian norberaren orientazio gaitasunak  ikusi eta ikasteko. Oinez, korrika, lagun artean edo lehiatzen, orientazio kirolaz gozatu ahal izango da.

Horretaz gain, azpimarratu behar da, orientazio kirola ezagutzeko, urte guztian zehar aukera dagoela Zegamako orientazio zirkuituaren bitartez, zehazki Anduetza parketxera hurbilduz eta bertan banatzen diren maparekin.

Informazioa eta izen ematea: http://gotorientazioa.org/zegama-otzaurte-2018-liga-norte/

Advertisements

Zegamako orientazio ibilbide iraunkorra

Datorren azaroaren 26an zabalduko da Zegamako orientazio ibilbide iraunkorra eta ekitaldi berezi moduan, egun horretan bertan, orientazio proba herrikoia ospatuko da herriko plazan goizeko 10etatik aurrera.

Zehazki hiru orientazio ibilbide antolatu dira, zailtasun mailaren arabera. Errazena, etxeko txikienekin egiteko modukoa da; altxorraren bila jolasteko aukera paregabea. Ibilbide ertaina, berriz, orientazio kirola ezagutu eta mendian ibiltzen ohituta daudenentzako dago pentsatuta; 4 kilometroko ibilbide luzea, berriz, orientazio gaitasun fina eskatzen duen ibilbide bat da. Egunean bertan jarriko diren balizak bilatu beharko dituzte parte hartzaileek.

Familia zein heldu, taldeka edo bakarka, parte hartu ahal izango dute orientazio proba herrikoi honetan. Era berean, orientazio kirolaren oinarrizko ikastaro bat ere izango da (herriko plazan) goizeko 10etan, lehen aldiz, orientazio proba batean parte hartu nahi duenarentzat. Probaren xehetasun guztiak eta izen ematea www.GOTorientazioa.org web orrian dago.

San Martin Feriako egitarau zabala

Zegamako Udalak San Martin Feriako egitarau zabalari gaur emango dio hasiera. Luis Mari Zalduak Zegama izenaren jatorri, esanahi eta garrantziaz hitzaldia emango du gaur, arratsaldeko 7etan, Anduetza parketxean.

Bihartik aurrera, egitarau zabal honen barruan, egurrezko eskulturen erakusketa izango da Anduetza Parketxean Orbelaun Taldeak antolatuta.

Hemen San Martin Feriako egitaraua

 

Cava Fest

Zegamako elkarteek eta Zegamako Udalak elkarlanean antolatu duten festa honek, Cava desberdinak eta kalitatezkoak ezagutzera emateko helburua du. Zegamak, San Sadurni d´Anoiarekin duen anaikidetza erlazioa dela eta, festa hau ospatzen hasi zen. Etxe guztietako adituak izango dira eta guztien artean zenbait tailer eskainiko dituzte.

Goierrin barna, iluntzean Zegamara gerturatzeko aukera izango da eta gauean Beasainera bueltatzeko ere zerbitzua egongo da.

II. Ehiza eta Natura Feria

img_20160929_141053

Anduetza Parketxeak argazki erakusketa batekin  parte hartzen du feria honetan. Argazkietan oreinak morro egiten, ehiza txakurrak eta oilagorrak ikusiko dira besteak beste. Egitaraua osatzeko eta familiei zuzendutako “Jaten den egurrik ba al dago?” jarduera izango da eguerdiko 13:00etan eta arratsaldeko 17:00etan.

Zegamako frontoian ehiza munduaren inguruko elkarteen eta enpresen postuak izango dira. Frontoiaren kanpoaldean, lur orotarako ibilgailuen eta ehiza txakurren erakusketa izango da. Ehiza txakurrek hainbat erakustaldi egingo dituzte egunean zehar. Egitarau zabal honetan, falkoneria, karabina tiroketa, arku tiroketa, tiro simulatzailea eta umeentzako jarduerak izango dira herrian zehar.

Zur eta Lur, errepikatzeko modukoa

Copia de P1070449

Anduetza Parketxeak Zegamako Udalaren ateak jo zituen, biok elkarrekin, Zur eta Lur izenburupean, jarduera kulturalak antolatzeko asmoarekin. Helburua, jarduera kulturalen bitartez, Anduetza Parketxeak lantzen dituen baloreak plazaratzea izan zen.

Copia de P1070410

Zur eta Lur egitarauan askotariko jarduerak izan ditugu. Egurrarekin musika egin genuen Juan Mari Beltran hirukotearen kontzertuaren bitartez. Ondoren, Aizkorri-Aratz Natura Parkean dagoen San Adrian igarobidean Historiaurrean bizi izan ziren gizakien bizimodua ezagutu genuen. Ondoren, gure mendiak protagonista diren mitologian oinarrituta,  ipuin harrigarriak izan genituen Jentilbaratzako Marimunduko sorginarekin. Eta bukatzeko, Olentzero lagun eta bere istorioak kontatu ondoren, talo tailerra burutu zen elikadura jasangarrian oinarritua. Guztira, Anduetza Parketxean 474 parte-hartzaile izan ditugu eta hemendik eskerrik beroenak eman nahi dizuegu!

Zur eta lur Zegaman

Anduetza Parketxeak eta Zegamako Udalak kultur jardueraz beteriko udazkena antolatu dute. Lehen jarduera, Herri Musika izenburua duen musika emanaldia izango da, datorren azaroak 22an arratsaldeko 19:00etan.

IMG_3233-2

Emanaldi honetan Juan Mari Beltran, Soinuenea Fundazioaren burua izango dugu gidari, bere lantaldeko bi kideren laguntzarekin. Emanaldiak antzinatik gure herrialdean erabili diren egurrezko musika tresnak izango ditu oinarri eta aspaldiko piezak protagonista. Anduetza Parketxean dagoen egur bildumak giro berezia emango dio udazken arratsalde honi. Etorri eta musikaz gozatu ezazu!

Natura interesgune berri bat Zegaman

Asteburu honetan, Zegaman zuhaitz berezien inguruan burutu diren jardunaldietan, munduko 35 zuhaitz monumental eta bereziren oinordekoak landatu dira Anduetza Parketxearen inguruan. Honenbestez, hemendik aurrera, beste erakargarritasun bat gehiago izango du Zegamak Anduetza Parketxearen eskutik bisitariei erakusteko.

P1060548

Zuhaitz berezi hauek, “Marti Boada” zuhaitz-bildumako landaretxoak dira, arrazoi bat edo beste bat tarteko, monumental eta berezi izendapena jaso duten zuhaitzen oinordekoak. Martí Boada zientzialaria izan zen zuhaitz hauen haziak jasoz bilduma hau egiten hasi zena eta, bera, gure artean izateko ohorea izan dugu asteburu honetan Zegaman. Martí Boada zientzialari oso ezaguna da mundu mailan eta besteak beste, Nelson Mandelaren eskutik Nazio Batuen munduko ingurumen-saria jaso zuen 1995ean.

Zegama eta Martí Boadaren arteko harremana ordea ez da gaurkoa, 2008an hasi zen Sant Celoní herrian (Bartzelona) egitekoa duten Europako Basoen Museoaren proiektuaren ildotik. Duela zazpi urte Zegamako interpretazio zentroko egur-bilduma ikustera etorri eta bisita horren fruitu izan da asteburu honetakoa.

P1060486

Jendearen harrera bikaina izan da bai larunbatez bai igandez antolatu diren ekitaldietan. Oso interesgarri suertatu dira Martí Boadak eta Jordi Bartroli kimikariak (Bartzelonako Unibertsitate Autonomoko ikerlariak) emaniko hitzaldiak eta gai hauetan adituak diren pertsona ugariren arreta bereganatu dute. Larunbat arratsaldean berriz, hain gurea dugun txalaparta doinuez girotuta, zuhaitz berezi hauetako batzuk landatzeko aukera izan dute bertaratu diren herritarrek eta aurrerantzean, hauek zaintzeko eta erakusteko konpromisoa hartu du Udalak herritarren izenean Sant Celoniko Udalarekin batera hitzarmen bat sinatuz.

Copia de P1010693

Igande goizerako Anduetza Parketxeak antolatutako ibilaldi gidatuak ere berebiziko arrakasta izan dute. Martí Boada gidari dela zuhaitz berezi hauen bitxitasuna bertatik bertara ezagutzeko aukera izan den eta jarraian, Parketxeko xilotekan jasotzen diren zuhaitz berezienen egurrak ukitu, usaindu eta sentitzekoa. Eskerrik asko herritik zein Euskal Herri osotik Zegamara hurbildu eta ekintza hauetan parte hartu duzuen guztioi.