Tag Archives: mitologia

Hitz egin dezagun mitologiaz

Aurtengo MITOALDIA martxa ezin hobean doa. Gaurkoan, Marimundukoren eskutik ipuin kontaketa ederraz gozatu dugu Barandiaran Museoan elkartu garen 80 lagunok. A ze goiz magikoa!

dav

Baina, lasai, helduontzako ere badugu planik. Juan Inazio Hartsuaga izango da aurtengo gonbidatu berezia Barandiaran Museoan. “Euskal mitologia egituratua” izeneko hitzaldia eskainiko digu asteazken honetan, uztailak 11, arratsaldeko 19:00etan, euskaraz. Sarrera doakoa izango da, baina aurrez izena ematea ezinbestekoa da, toki mugatua baitago.

JIHartsuaga

Hitz egin dezagun mitologiaz.

Izen-ematea 943 180 335 / 688 895 069 / barandiaran@gipuzkoamendizmendi.net

MITOALDIA 2018ko egitarau osoa ikusteko sakatu HEMEN.

Advertisements

Motorrak berotuta Mitoaldirako

Gaur goizean prentsaurreko berezia eskaini dugu Donostiako Koldo Mitxelena aretoan. Ataungo mendietatik zuzenean joan gara Torto, sorginak, Maru, Patxi Erremenatari, pregoilaria, Jentilbaratza Elkarteko kideak eta Barandiaran Museoko ordezkariak.

Iaz baino indartsuagoa eta osatuagoa dakarkigu 2. MITOALDIA. Xehetasun guztiak eskaini ditugu goizeko prentsaurrekoan.

Asteburu honetako jardueretarako lekua geratzen da oraindik, baina bizkor ibili!

  • Ostiralean, Errementari filma eta zuzendariaren solasaldia
  • Larunbatean, Ataungo mitologia gune esanguratsuenetatik ibilaldia
  • Igandean, ipuin kontaketa antzeztua Marimundukoren eskutik

Bizi mitologia Ataunen!

Hona hemen prentsaurrekoaren bideoa eta argazki batzuk:

Foto de Aralar (1)

IMG-20180704-WA0000-1

Ataunen, iparra galdu gabe

Gaurko goiza bustitik hasi badugu ere, 40tik gora pertsona hurbildu dira Ataungo Barandiaran Museoan antolatu dugun Mitologia orientazio jolasera.

Aurkitu beharreko altxor guztiak aurkitu dituzte familiek eta mapa baten gainean ederki orientatzen direla erakutsi digute. Joxemiel Barandiaranek jasotako kondaira ugari ikasi dituzte eta baita Ataungo txoko eder batzuk ezagutu ere. Hona hemen gaurko argazki batzuk:

P1110261

Mitologia orientazio jolasa Ataunen

Dagoeneko ate joka dugu udaberria eta ziur Aste Santurako planak egiten ere hasiak zaretela. Hementxe gatoz familian egiteko plan eder batekin.

Aralar eta Ataungo bazterrak ezagutzeko eta bertako ondare naturalarekin zein kulturalarekin gozatzeko MITOLOGIA ORIENTAZIO JOLASA antolatu dugu, pazko asteko igandean, apirilak 8an. Familian goiz ederra pasako duzue, Barandiaran Museo inguruan dauden pistak aurkitu beharko dituzue, mitologiarekin zerikusia izango dutenak.

Horrez gain Barandiaran Museoan eta Errotatxon egunero bisita gidatu bereziak eskainiko dira 11:30etan, Talo tailerrak egiteko aukera ere egongo da eta baita Aralarko Natura Parkean zehar ibilaldi gidatuak ere.

Plan sorta ederra beraz, mitologiaz zein naturaz gozatzeko eta jolastuz ikasteko.

Eman izena eta ez zaitez lekurik gabe geratu!

Aste Santua Barandiaran 2018

Magiaz beteriko goiza atzokoa Ataunen

Gaur egungo munduaren eta mundu mitologikoaren arteko zubia igaro genuen atzo. Tentuz, urduri eta zer suma ekin genion bideari Lizarrustiko Parketxean elkartu ginen 500dik gora abenturazaleok. Giroa hotza, behelainoz arindua eta Allekupeko mendia, arraro.

Bidean aurrera egin ahala ulertu genuen giro misteriotsu horren zergatia. Zorionekoak gu, hainbat pertsonaia mitologikorekin topo egiteko zortea izan genuelako. Gainera, Olentzero ikusteko aukera ere izan genuen eta ez edozein lekutan! Txondorrean ikatza ateratzen topatu genuen, lan eta lan. Hiru astez piztuta egon ondoren atzo itzali genuen Lizarrustiko Txondorra. Goiz borobila beraz atzo bizitakoa.

P1100553

dav

Lan handia egin du Jentilbaratza Elkarteak atzoko ikuskizuna aurrera eramateko, mila miloi esker botatako izerdi guztiagatik. Haurren aurpegiak izan genituen ordainetan atzo. Eskerrik asko atzokoan etorri zineten familia guztiei ere, eta plazarik gabe geratu zareten ehundaka eta ehundaka pertsonei zeresanik ez, mila esker azaldutako interesagatik.

Izango dira aukera gehiago hurrengo urtean! Ondo amaitu dezazuela urtea eta magiaz betetakoa izan dadila datorrena guztiontzako, Aralarko Parketxeak Urte Berri ona opa dizue!

Amaitu da I. MITOALDIA

Igaro den astea berezia izan zen Ataungo Barandiaran Museoan. Barandiaranek hainbeste urtetan paperean jasotako altxorrak gizarteratzen jarraitzeko ekimen handi bat jarri genuen abian I. MITOALDIA izenburupean. Gipuzkoako Parketxe Sarea Fundazioak eta Jentilbaratza Elkarteak lankidetzan eraman dugu aurrera asmo handiko proiektu hau.

Harrera ezin hobea izan zuen hasiera-hasieratik herritarren artean eta mitologiaren transmisio-soka sendotzeko bidean beste pausu txiki bat eman dugunaren sentsazioa dugu antolatzaileok, familia ugarik hala adierazi digute eta. Denetariko bisitariak izan ditugu: ikasleak, familiak, helduak, taldeak…

Mitoaldia orokorra_collage

Aurtengoan lehen alea erein dugu, baina bide luze baten hasiera besterik ez da hau, aurtengoa LEHENENGO MITOALDIA izan bada ere, datozen urteetan sorpresa gehiagorekin itzuliko da ekimena.

Mila esker bihotzez gurera gerturatu zineten bisitari guztioi. Laster berri gehiago izango dituzue, urte amaiera bitartean bi jarduera berezi izango ditugu eta Aralarko Parketxean: LIZARRUSTIKO TXONDORRA piztuko dugu abenduaren 3an eta hura itzaltzearekin batera, abenduaren 23an, JENTILAK ETA OLENTZERO ibilaldi magikoa ospatuko dugu.

Izango duzue gure berri! Bizi mitologia Ataunen!

Hala bazan, ez bazan…

I.MITOALDIA ekimenaren barruan antolatutako “Euskal Herriko mito eta ipuin zaharrak” ipuin kontaketako bi saio ospatu ditugu gaur goizean Ataungo Barandiaran Museoan. Oilo-ipurdia jartzeko moduko ipuin, leienda eta kondairak antzeztu ditu Marimundukok, Akerbeltz, Etsai eta beste pertsoanaia mitologikoen laguntzaz. Barandiaranek lan handia egin zuen mitologiaren trasmisio soka eten ez zedin eta gaur lekuko hori hartu eta mitologia bizi egin dugula esango genuke.

P1090378

Hala bazan, ez bazan, sar deilla kalabazan eta atera deilla Ataungo plazan!

Lasai lagunak, I.MITOALDIA ez da amaitu, ostiral iluntzean, 19:00tan Toti Martinez de Lezea etorriko da Barandiaran Museora eta “Mitologiaren bidezidorretatik” solasaldia eskainiko digu. Larunbatean Jentilen Etorrera ikuskizunak emango dio amaiera mitologia aste honi. Galduko al duzu?

Bizi mitologia! 

Mitoaldia orokorra 2017_2

I. Mitoaldia, motorrak berotzen

Gaur goizean, I. MITOALDIA ekimena plazaratu asmoz prentsaurrekoa eman dugu Koldo Mitxelena kulturunean. Komunikabide ugari bertaratu dira eta proiektu honen nondik norakoak azaldu ostean ingurua girotzera atera gara kalera, Ataungo mendietatik zuzenean jaitsitako pertsonaia mitologikoen laguntzaz. Gipuzkoako Parketxe Sarea Fundazioko eta Jentilbaratza Kultur Elkarteko kideak izan gara bertan. Honatx prentsaurrekoa:

I. MITOALDIA

IMG-20171025-WA0004

Bizi mitologia! Zatoz Atauna!

 

 

 

I. MITOALDIA. Bizi mitologia!

Ipuin edo kontu fantastiko sorta ez ezik, mitologia errealitatea esplikatzen duten argibideen multzoa da. Bizimodua arautzeko balio ez duenean baizik ez da bilakatzen mitologia kontu edo ipuin fantastiko bilduma, baina, orduan ere, ematen duen informazioa aintzat hartzeko modukoa da. Izan ere, beste azalpenik ezean, gertakari naturalei aurre egiteko nahiz euren buruak lasaitzeko, mitoak herritarrei ingurunea ulertzen lagundu dien lanabesa izan dira mendeetan zehar.

Barandiaranek lan handia egin zuen mitologiaren transmisio soka eten ez zedin. Hain zuzen, ahozko tradizioa paperean bilduz altxorra utzi zion herriari eta hura gizarteratzen jarraitzeko  ekimena jarri dute abian Jentilbaratza Kultur Elkarteak eta Gipuzkoako Parketxe Sarea Fundazioak, I. MITOALDIA.

Mitoaldia orokorra 2017_2

Leku mugatua dagoenez, aurrez izena ematea nahitaezkoa izango da, beraz deitu Barandiaran Museora berandu baino lehen!

Bizi mitologia!

Ilunak argitu ziren atzo Ataunen

Hala idatzi zuen Joxemiel Barandiaranek Euskal Herriaren Mitologia liburuan:

“Gizakiak, unibertso fisikoaren edo neurri batean bere zerbitzura jartzea lortu duen eragile naturalaren jokaera normalei dagozkien fenomenoen ikuskeraz gainera, eta aztertuak ditugun adierazpenen ikuskera magiko eta halabeharrezkoez gainera, bada munduaren beste ikuskera bat ere, non ustez espirituak edo jainkoek biziaraziak diren numenek eta indarrek zeregin garrantzizko bat betetzen duten eta herri sineskizun eta elezahar anitzetan gardentzen diren.”

Bart, iluntzean, hitz horiek inoizko zentzu handiena hartu zuten. Munduaren beste ikuskera hori, atzo gardendu eta bizitu izan genuen Ataungo Barandiaran Museoan elkartu ginen 1500 lagun baino gehiagok.

Gau magiko eta ziraragarria izango zela agindu genuen, eta hala izan zen hasiera-hasieratik. Etzen izaki magikorik falta izan: Torto, Sorginak, Lamiak, Izugarri, Sanmartintxiki, Jentilak…

Jentilbaratzako kideoi zer esan. Iaz hitzik gabe geratu ginen, oraingoan badugu elerik. Ez da Euskal Herri osoan horrelako herri-ekimenik, herri oso bat eskutik heldu eta mundu mitologikoa hedatzeko helburuz hainbeste bilera, entsegu eta prestaketa lanik egiten duenik. Bidelagun mundialak zarete eta esker oneko hitzak besterik ez ditugu zuentzat. Beste behin, huts egin ez ezik, goititu egin zarete. Zorionak bihotzez.

Zuei, bisitari maiteoi, eskerrak eman nahi dizkizuegu, atzoko egun ederra gurekin eta familiartean bizitzera etortzeagatik. Uste baino ausart gehiago gerturatu zineten eta eskertzekoa da ibilbide osoan izandako jarrera eta pazientzia. Bidenabar ohartxo bat, sekretutxo bat, txutxu-mutxu bat… badugu sorpresa gehiago urtea amaitu aurretik, Mundu Mitologikoan murgiltzeko aukera gehiago izango duzue Barandiaran Museoan… baina momentuz ezin dizuegu askoz gehiago aurreratu… soilik mundiala izango dela… shhhhhh….

Gogoratu: Gaua Gauezkoentzat da.

Hurren arte!

Barandiaran Museoa