Tag Archives: aralar

Igaratza arakatzera animatuko al zara?

Igaratzako Historiaurreko altxorrak ezagutzeko ibilaldi gidatua Jose Antonio Mujikarekin. Neolitotik erromatar garaira.

Gutxi dira Gipuzkoan Aralar bezalako tokiak eta are gutxiago Igaratza bezalako bazterrak. Paisaia hunkigarriaz gainera, bisitariak aziendaren zintzarriek onduriko doinuaz goza dezake han; hitz bitan, bakea senti daitekeen txoko urri horietakoa da Igaratza, hiri-eremutik gertu, baina, era berean, oso urruti dagoen paradisu txiki bat.

2012. urtetik aurrera, Euskal Herriko Unibertsitateko Jose Antonio Mujika irakasleak zuzenduriko ikerketa-taldeak, miaketa lanaren ondorioz Igaratzan idorotako zenbait elementutan nahiz lehendik (batez ere Barandiaranen lanari esker) ezagutzen ziren beste egitura batzuetan arkeologikoki esku hartu du, behin baino gehiagotan emaitza harrigarriak lortuz, Beaskinarte eta Aiatzio izeneko guneetan egindako aurkikuntzak lekuko.

Lehendik ezagutzen ziren altxorrak hobe ulertzen laguntzeko eta, bereziki, berriki aurkitu direnak aurkezteko, ibilaldi gidatua antolatu dugu Igaratzara irailaren 30ean (igandearekin), Jose Antonio Mujikaren gidaritzapean antolatu ere.

Aurrez izena eman beharko da eta plazak mugatuak izango dira.

Historiaurreko Aztarnak IGARATZA2018 (2)

Advertisements

Igaratzako irteera bertan behera

Biharko Aralarren antolatuta genuen historiaurreko aztarnak ezagutzeko ibilaldia bertan behera geratzen da. Eguraldi iragarpenak ez dira oso ziurrak eta Igaratza alde horretan lainoa arriskutsua izan liteke. Iraila aldera egingo dugu beste saiaketa bat, egon zaitezte adi!

dibujo-gotas-lluvia

Igaratzako altxorrak

Igaratzako Historiaurreko altxorrak ezagutzeko ibilaldi gidatua Jose Antonio Mujikarekin. Neolitotik erromatar garaira.

Gutxi dira Gipuzkoan Aralar bezalako tokiak eta are gutxiago Igaratza bezalako bazterrak. Paisaia hunkigarriaz gainera, bisitariak aziendaren zintzarriek onduriko doinuaz goza dezake han; hitz bitan, bakea senti daitekeen txoko urri horietakoa da Igaratza, hiri-eremutik gertu, baina, era berean, oso urruti dagoen paradisu txiki bat.

2012. urtetik aurrera, Euskal Herriko Unibertsitateko Jose Antonio Mujika irakasleak zuzenduriko ikerketa-taldeak, miaketa lanaren ondorioz Igaratzan idorotako zenbait elementutan nahiz lehendik (batez ere Barandiaranen lanari esker) ezagutzen ziren beste egitura batzuetan arkeologikoki esku hartu du, behin baino gehiagotan emaitza harrigarriak lortuz, Beaskinarte eta Aiatzio izeneko guneetan egindako aurkikuntzak lekuko.

Lehendik ezagutzen ziren altxorrak hobe ulertzen laguntzeko eta, bereziki, berriki aurkitu direnak aurkezteko, ibilaldi gidatua antolatu dugu Igaratzara uztailaren 21ean (larunbatarekin), Jose Antonio Mujikaren gidaritzapean antolatu ere.

Aurrez izena eman beharko da.

Historiaurreko Aztarnak IGARATZA2018

 

Aralarko eguzkipetik

Atzo, eguzkiaren izpi atseginez gozatu genuen Aralarko Parketxean elkartu ginen 50etik gora lagunok. Baina ez ginen goxotasun horri probetxua atera genion bakarrak izan. Udaberria igaro den moduan igaro denez, narrastiak ere giro atseginagoen irrikitan daude. Atzo, horietako batzuk gertutik ikusteko aukera izan genuen (sugeek ihes egin ziguten, baina) anfibio ugariz gain.

Narrasti eta anfibio espezieak desberdintzen ikasi genuen eta gainera, horietako asko gertutik eta bertatik bertara ikusi ahal izan genituen. Narrastiei historikoki eman zaien ospe txarra eta hamaika mito baztertu genituen eta errespetua besterik ez diegula zor ikasi genuen.

Goiz polita izan zen, Aralarrek ezkutatzen dituen altxorren erakusleiho bikaina.

DSC_0303

 

 

Nahi duenak beste aukera bat izango du igande honetan, ibilaldia errepikatuko dugu eta, oraingoan Listorretan (Errenteria). Horretarako Arditurriko Parketxearekin jarri behar zarete harremanetan (943495069).

Atzoko irteeran erakutsitako Euskal Herriko anfibio eta narrastien posterrak, ikusgai eta deskargatzeko aukerarekin, dituzue Ander Izagirreren blogean:  http://naturzalia.blogspot.com.es/p/posterrak.html.

 

Ezagutu nahi al duzu Aralarko herpetofauna?

Herpetofaunak narrasti eta anfibioei egiten die erreferentzia. Ezagutzen al ditugu gure inguruko narrasti eta anfibio espezieak?

Bada, igande honetan aukera ederra eskaintzen dugu Aralarko Parketxean, Ander Izagirre adituaren eskutik. 10:00etan elkartuko gara Lizarrustiko Parketxean, Lareoko urtegira oinez joango gara eta bertan bilatuko ditugu animaliok.

Aukera ederra da familian mundu ezagun hau gertuagotik ezagutzeko.

Eman ezazue izena eta animatu abentura honetan!

Narrastiak kartel orokorra 2018

Egonaldiak Aralarko natura parkean!

Astea bikain hasi dugu Aralarko Parketxean. Eguraldia lagun, Arteako Eskola etorri zaigu bisitan oraingoan eta makina bat gai landu ditugu ikasle jator hauekin: mitologia, arkeologia, Joxemiel Barandiaran, errota, mendia, zerealak, taloa… guztia jolasean eta giro paregabean!

Egonaldi ugari ditugu udaberri honetarako, Euskal Herriko bazter guztietatik datozenak, eta ia lekurik ez dugu Lizarrustiko Aterpetxean, baina datorren ikasturterako erreserbak egiten hasiak gara dagoeneko, beraz lekurik gabe geratu nahi ez baduzue, jarri gurekin harremanetan eta egin ezazue erreserba berandu baino lehen!

Hona hemen egunotako argazki batzuk.

Zuen zain gaude!

943 18 03 35

barandiaran@gipuzkoamendizmendi.net

Ataunen, iparra galdu gabe

Gaurko goiza bustitik hasi badugu ere, 40tik gora pertsona hurbildu dira Ataungo Barandiaran Museoan antolatu dugun Mitologia orientazio jolasera.

Aurkitu beharreko altxor guztiak aurkitu dituzte familiek eta mapa baten gainean ederki orientatzen direla erakutsi digute. Joxemiel Barandiaranek jasotako kondaira ugari ikasi dituzte eta baita Ataungo txoko eder batzuk ezagutu ere. Hona hemen gaurko argazki batzuk:

P1110261

Mitologia orientazio jolasa Ataunen

Dagoeneko ate joka dugu udaberria eta ziur Aste Santurako planak egiten ere hasiak zaretela. Hementxe gatoz familian egiteko plan eder batekin.

Aralar eta Ataungo bazterrak ezagutzeko eta bertako ondare naturalarekin zein kulturalarekin gozatzeko MITOLOGIA ORIENTAZIO JOLASA antolatu dugu, pazko asteko igandean, apirilak 8an. Familian goiz ederra pasako duzue, Barandiaran Museo inguruan dauden pistak aurkitu beharko dituzue, mitologiarekin zerikusia izango dutenak.

Horrez gain Barandiaran Museoan eta Errotatxon egunero bisita gidatu bereziak eskainiko dira 11:30etan, Talo tailerrak egiteko aukera ere egongo da eta baita Aralarko Natura Parkean zehar ibilaldi gidatuak ere.

Plan sorta ederra beraz, mitologiaz zein naturaz gozatzeko eta jolastuz ikasteko.

Eman izena eta ez zaitez lekurik gabe geratu!

Aste Santua Barandiaran 2018

Irekita “Jentilak eta Olentzero” ibilaldi magikorako izen ematea

Ataungo Lizarrusti Parketxean abenduaren 23rako antolatu dugun “Jentilak eta olentzero” ibilaldi magikoan izena emateko zerrenda irekita dagoela jakinarazten dizuegu. Erreserba egiteko bi bide daude, telefonoz (94318 03 35) edota emailez (barandiaran@gipuzkoamendizmendi.net).

Aurrez, esan, jakin badakigula oso denbora gutxian agortuko direla lekuak, ehunka eta ehunka pertsona ari zaretelako deitzen informazioa eskatuz, eta pena handiz, baina agortu ondoren ezin izango dugula izen gehiago hartu. Egunean bertan ez da onartuko sarrerarik ez duen inor. Jarduera honen kalitatea eta segurtasuna bermatu nahi ditugu, hortaz, sentitzen dugu kanpoan geratuko zareten guziongatik, bihotzez, eta ulertuko duzuelakoan gaude. Bai Barandiaran Museoan eta baita Lizarrustiko Parketxean ere, urte osoan zehar makina bat jarduera antolatzen ditugu, hemengo ondare kulturala zein naturala hedatu asmoz eta hurrengoan izango duzue aukera berriro ere.

Bi ordu eta erdi/hiru bat orduko ibilaldia izango dela aurreikusten dugu, nahiz eta zailtasun aldetik ez den ibilaldi zaila, 5 urtetik beherakoentzat ez da gomendagarria, baldin eta haurra ez badago mendian ohitua. Ibilaldiaren hasieran eta amaieran 10-15 minutuko aldapa egongo da, baina tarteko ibilaldia baso lau batetik zehar egingo da, ia desnibelik gabekoa, pagadi eder eta magiko batetik hain zuzen, pertsonaia mitologikoen bizileku den Allekupeko basoetatik.

Lizarrustiko aparkalekua txiki geratzen zaigu horrelakoetan, hortaz, arren, ahalik eta kotxe gutxienetan etorri.

Mendiko arroparekin etor zaitezte eta noski, mundu mitologikoan murgiltzeko gogoz eta ilusioz! Olentzerori eskutitza eskura emateko aukera izango duzue, hura topatuko bagenu behintzat!