Category Archives: Aralar Parke Naturala

Aralar, lurralde mitologiko hori

Magiaz eta ilusioz bete zen atzo Aralar. Mendez mende, ahoz aho transmititu eta Barandiaran, Arin edo Arratibeli esker idatziz jasotako leienda eta istorio ederrak bizi genituen Aralarko natur ingurune zoragarrian.

DSC_0160

Lizarrustiko parketxetik abiatuta, 600 lagun, hiru taldetan banatuta, Allekuko baso ederrean murgildu ziren. Izaki mitologikoak eta ipuinetako pertsonai ugari azaldu ziren ibilaldian zehar ipuin eta istorio ederrak kontatuz: Mateo txistu, Maribelar, Sorginmari, Martin beltz,  Aker beltz, Maridomingi, Sanmartin txiki, basagizona, lapurrak, haurrak, jentilak, Torto, Basajaun… eta nola ez, baita Olentzero ere!

Ataungo Jentilbaratza kultur elkarteko lagunek eskainitako ikuskizuna zoragarria izan zen. Eskerrik asko bihotzez egindako lanagatik eta mila esker hurbildutako guztiei. Lekurik gabe gelditutakoei adierazi nahi diegu, lanean jarraituko dugula guztiontzat aukera berriak sortzeko.

2019rako… Zaku bete plan, egitasmo eta ilusio

Eskerrik asko guregana hurbildu zareten guztioi 2018 honetan zehar, eta, hainbeste une eder gurekin batera partekatzeagatik; 2019an ere lanean jarraituko dugu gure artean gustura jarrai dezazuen.

EGUBERRI ETA URTEBERRI ON Gipuzkoako Parketxe Sareko lantalde guztiaren partez!

Olentzero

Advertisements

BETETA DAGO “JENTILAK ETA OLENTZERO” IBILALDI MAGIKOA

Jakinarazten dugu BETETA dagoela Jentilak eta Olentzero 2018 ibilaldi mitologikoa. Badakigu, pena handiz,  asko eta asko geratu zaretela sarrerarik gabe, baina, jarduerak dituen ezaugarriengatik ez da posible jende gehiago hartzea ekintza beraren segurtasuna eta kalitatea ziurtatzeko. Ulertuko duzuelakoan mila esker beste behin bihotz-bihotzez guztioi, izena eman duzuenoi eta lekurik gabe geratu zaretenoi ere.

Jentilak eta Olentzero_2018Beteta

BIHAR, GOIZEKO 10:00ETAN, IREKIKO DA “JENTILAK ETA OLENTZERO” IBILALDI MAGIKORAKO IZEN EMATEA

Ataungo Lizarrusti Parketxean abenduaren 23rako antolatu dugun “Jentilak eta olentzero” ibilaldi magikoan izena emateko zerrenda bihar ostirala (abenduak 14) goizeko 10:00etan irekiko dela jakinarazten dizuegu. Erreserba egiteko bi bide daude, telefonoz (94318 03 35) edota emailez (barandiaran@gipuzkoamendizmendi.net).

Aurrez, esan, jakin badakigula oso denbora gutxian agortuko direla lekuak, urtero bezala ehunka eta ehunka pertsona ari zaretelako deitzen informazioa eskatuz, eta pena handiz, baina agortu ondoren ezin izango dugula izen gehiago hartu.

Hainbat ohar garrantzitsu:

  • Egunean bertan ez da onartuko sarrerarik ez duen inor. Jarduera honen kalitatea eta segurtasuna bermatu nahi ditugu, hortaz, sentitzen dugu kanpoan geratuko zareten guziongatik, bihotzez, eta ulertuko duzuelakoan gaude. Bai Barandiaran Museoan eta baita Lizarrustiko Parketxean ere, urte osoan zehar makina bat jarduera antolatzen ditugu, hemengo ondare kulturala zein naturala hedatu asmoz eta hurrengoan izango duzue aukera berriro ere.
  • Bi ordu eta erdi/hiru bat orduko ibilaldia izango dela aurreikusten dugu, nahiz eta zailtasun aldetik ez den ibilaldi zaila, 3 urtetik beherakoentzat ez da gomendagarria, baldin eta haurra ez badago mendian ohitua.
  • Ibilaldiaren hasieran eta amaieran 10-15 minutuko aldapa egongo da, baina tarteko ibilaldia baso lau batetik zehar egingo da, ia desnibelik gabekoa, pagadi eder eta magiko batetik hain zuzen, pertsonaia mitologikoen bizileku den Allekupeko basoetatik.
  • Lizarrustiko aparkalekua txiki geratzen zaigu horrelakoetan, hortaz, arren, sarrerak eskuratzea lortzen duzuenok ahalik eta kotxe gutxienetan etorri.
  • Mendiko arropa eta oinetako egokiak beharrezkoak izango dira eta noski, mundu mitologikoan murgiltzeko gogoz eta ilusioz etortzea!

Zorte on eta laster arte!

Jentilak eta Olentzero_2018

Muga ez den muga

Andoni Egañak behin Maulen halaxe kantatu zuen hegoaldetik iparraldera kotxez zihoan baten paperetik:

Itsasoa da zoragarria
apar zuri arrats gorri
ez ote gera Zumaiatikan
Hendaiaraino etorri?
Baina zuk kasu egin zaiozu
aspaldiko Xalbadorri
eta ze kristo egin behar zaio
muga ez den muga horri?

Muga hori errealitate bat da egun, ikusezina, baina nabarmena hein handi batean. Elkar ezagutzen ote dugu Euskal Herriko Iparraldeko eta Hegoaldeko bizilagunek?

Bada alderik gure artean, esaterako, eta onartu beharrekoa, iparraldean, azken 30 urte luzeetan beren haurrak euskaraz ikas dezaten lan handia egin behar izan dute, ikastolak sortu eta mantentzeko zein euskara hauspotzeko. Euskal Herriko haurrei euskarazko irakaskuntza eskaini ahal izatea ez da lan erraza leku guztietan eta are gutxiago aire libreko jardueretan, gurea kasu. Gipuzkoako Parketxeetan gure hizkuntzari dagokion lekua aitortzea gustatzen zaigu, jarduerak euskaraz eramaten ditugu aurrera; euskaratik eta euskaraz, Maialen Lujanbiok kantatu zuen moduan.

txoria

Igaro den ikasturtean iparraldeko zenbait ikastola gurera etortzeko erabakia hartu zuten, Ataun eta Aralarko aberastasun kultural zein naturalaz gozatzeko helburuarekin. Lizarrustiko aterpetxean egonaldia egin zuten gurekin, hiru egunekoa gehienetan eta aurtengoan ere gurera etorriko dira.

Eta zuetako batzuk esango duzue, eta ze berri klase da hau Gipuzkoako Parketxe Sarearen blog baterako? Tira, blog honek Parketxeen egunerokotasuna azaltzea du xede eta guretzat garrantzitsuak diren gauzak zuekin konpartitzea. Beti ez gara txoriez, saguzarrez, mitologiaz eta artzaintzaz arituko; tarteka, gure kezkak eta pozak konpartitu nahiko genituzke zuekin, eta batzuetan, hausnarketa sakonagoak egiteko beta hartu.

Zenbat ikasi duten iparraldeko ikasle hauek lurrotan, mitologiaz, Joxemiel Barandiaranen lanen garrantziaz, hemengo artzaintzaz… baina batik bat, zenbat ikasi dugun guk haiekin! Badugu komuneko hizkuntza bat, komuneko kultura bat. Berdinak gara, eta era berean, desberdinak. Horri, aberastasuna esaten zaio. Hegoaldekook Iparraldera pastorala ikustera soilik igotzen bagara, edo Larrainera Tourra pasatzen denean, emozioa eta giro ederra biziko dugu, baina Iparraldearen irudi folklorizatua baino ez dugu jasoko. Iparraldea ezagutu beharra dugu, arestian aipatutako aberastasunaz jabetuko bagara.

“Haizea dator iparraldetik” zioen Xabier Letek, eta guk, ipar haizea, biziki maite dugu.

Aralar biluzten

Gutxi dira Gipuzkoan Aralar bezalako tokiak eta are gutxiago Igaratza bezalako bazterrak. Aralarko zenbait historiaurreko aztarna nahiko ezagunak dira, baina Igaratzan badira altxor berezi batzuk, ez nolanahikoak gainera.

Atzo, Joxan Mujika arkeologoaren eskutik aztarna hauetako batzuk ezagutzeko aukera ederra izan genuen. Talde polit bat elkartu ginen Lizarrustiko Parketxean goizean goiz eta baso marduletatik lehenik eta zelai zabaletatik gero, Igaratzara heldu ginen eguerdirako. Han, Beaskinarteko harrespila, Aiatzioko txabolak, Igaratzako trikuharriak, menhirra eta beste hainbat aztarnen nondik norakoak azaldu zizkigun Joxanek.

Giro bikaina, kontu interesgarriak, jende jatorra eta oro har, igande zoragarria atzokoa.

Igaratza arakatzera animatuko al zara?

Igaratzako Historiaurreko altxorrak ezagutzeko ibilaldi gidatua Jose Antonio Mujikarekin. Neolitotik erromatar garaira.

Gutxi dira Gipuzkoan Aralar bezalako tokiak eta are gutxiago Igaratza bezalako bazterrak. Paisaia hunkigarriaz gainera, bisitariak aziendaren zintzarriek onduriko doinuaz goza dezake han; hitz bitan, bakea senti daitekeen txoko urri horietakoa da Igaratza, hiri-eremutik gertu, baina, era berean, oso urruti dagoen paradisu txiki bat.

2012. urtetik aurrera, Euskal Herriko Unibertsitateko Jose Antonio Mujika irakasleak zuzenduriko ikerketa-taldeak, miaketa lanaren ondorioz Igaratzan idorotako zenbait elementutan nahiz lehendik (batez ere Barandiaranen lanari esker) ezagutzen ziren beste egitura batzuetan arkeologikoki esku hartu du, behin baino gehiagotan emaitza harrigarriak lortuz, Beaskinarte eta Aiatzio izeneko guneetan egindako aurkikuntzak lekuko.

Lehendik ezagutzen ziren altxorrak hobe ulertzen laguntzeko eta, bereziki, berriki aurkitu direnak aurkezteko, ibilaldi gidatua antolatu dugu Igaratzara irailaren 30ean (igandearekin), Jose Antonio Mujikaren gidaritzapean antolatu ere.

Aurrez izena eman beharko da eta plazak mugatuak izango dira.

Historiaurreko Aztarnak IGARATZA2018 (2)

Igaratzako altxorrak

Igaratzako Historiaurreko altxorrak ezagutzeko ibilaldi gidatua Jose Antonio Mujikarekin. Neolitotik erromatar garaira.

Gutxi dira Gipuzkoan Aralar bezalako tokiak eta are gutxiago Igaratza bezalako bazterrak. Paisaia hunkigarriaz gainera, bisitariak aziendaren zintzarriek onduriko doinuaz goza dezake han; hitz bitan, bakea senti daitekeen txoko urri horietakoa da Igaratza, hiri-eremutik gertu, baina, era berean, oso urruti dagoen paradisu txiki bat.

2012. urtetik aurrera, Euskal Herriko Unibertsitateko Jose Antonio Mujika irakasleak zuzenduriko ikerketa-taldeak, miaketa lanaren ondorioz Igaratzan idorotako zenbait elementutan nahiz lehendik (batez ere Barandiaranen lanari esker) ezagutzen ziren beste egitura batzuetan arkeologikoki esku hartu du, behin baino gehiagotan emaitza harrigarriak lortuz, Beaskinarte eta Aiatzio izeneko guneetan egindako aurkikuntzak lekuko.

Lehendik ezagutzen ziren altxorrak hobe ulertzen laguntzeko eta, bereziki, berriki aurkitu direnak aurkezteko, ibilaldi gidatua antolatu dugu Igaratzara uztailaren 21ean (larunbatarekin), Jose Antonio Mujikaren gidaritzapean antolatu ere.

Aurrez izena eman beharko da.

Historiaurreko Aztarnak IGARATZA2018

 

Hitz egin dezagun mitologiaz

Aurtengo MITOALDIA martxa ezin hobean doa. Gaurkoan, Marimundukoren eskutik ipuin kontaketa ederraz gozatu dugu Barandiaran Museoan elkartu garen 80 lagunok. A ze goiz magikoa!

dav

Baina, lasai, helduontzako ere badugu planik. Juan Inazio Hartsuaga izango da aurtengo gonbidatu berezia Barandiaran Museoan. “Euskal mitologia egituratua” izeneko hitzaldia eskainiko digu asteazken honetan, uztailak 11, arratsaldeko 19:00etan, euskaraz. Sarrera doakoa izango da, baina aurrez izena ematea ezinbestekoa da, toki mugatua baitago.

JIHartsuaga

Hitz egin dezagun mitologiaz.

Izen-ematea 943 180 335 / 688 895 069 / barandiaran@gipuzkoamendizmendi.net

MITOALDIA 2018ko egitarau osoa ikusteko sakatu HEMEN.